Starfsreglur fyrir Landbúnaðarháskóla Íslands
I. KAFLI
Hlutverk háskólans.
1. gr.
Landbúnaðarháskóli Íslands er vísindaleg fræðslu- og rannsóknastofnun á háskólastigi er byggir á lögum nr. 57/1999 um búnaðarfræðslu og lögum um breytingu á framangreindum lögum nr. 71/ 2004, lögum nr. 136/1997 um háskóla og lögum nr. 64/1965 um rannsóknir í þágu atvinnuveganna, með síðari breytingum nr. 79/2004.
Landbúnaðarháskóli Íslands veitir nemendum sínum fræðslu og vísindalega þjálfun, þannig að þeir geti tekið að sér sérfræðistörf fyrir íslenskan landbúnað og unnið að rannsóknum í þágu hans. Háskólanum er heimilt að veita framhalds- (meistara-og doktorspróf) og starfs- og endurmenntun í þeim fræðum sem kennd eru við skólann. Þá skal háskólinn miðla fræðslu til almennings og veita samfélaginu þjónustu í krafti þekkingar sinnar.
II. KAFLI
Stjórnskipulag.
2. gr.
Háskólaráð
Stjórn Landbúnaðarháskóla Íslands er falin háskólaráði og rektor í umboði landbúnaðarráðherra sem fer með yfirstjórn starfseminnar samkvæmt fyrrgreindum lögum.
Háskólaráð markar stefnu í kennslu og rannsóknum og mótar skipulag háskólans. Háskólaráð kveður á um skipulagningu fagdeilda innan háskólans og meginstarfstilhögun. Háskólaráð getur ákveðið sérstök viðbótarinntökuskilyrði fyrir hverja skilgreinda námsbraut háskólanámsins (sbr. 10. gr. laga nr. 57/1999). Háskólaráð veitir landbúnaðarráðherra umsögn um ráðningu rektors.
Rektor er formaður háskólaráðs og boðar til funda eftir þörfum. Óski þrír háskólaráðsfulltrúar eftir fundi er rektor skylt að boða til hans. Varamenn sitja fundi ráðsins í forföllum aðalfulltrúa.
Háskólaráðsfundur er ályktunarbær ef tveir þriðju hlutar atkvæðisbærra manna sækja fund. Afl atkvæða ræður úrslitum mála. Falli atkvæði jöfn ræður atkvæði rektors úrslitum. Færa skal til bókar ákvarðanir háskólaráðs.
3. gr.
Rektor Landbúnaðarráðherra skipar rektor til fimm ára að fenginni umsögn háskólaráðs. Rektor er yfirmaður stjórnsýslu háskólans og ber ábyrgð á rekstri hans. Hann ber ábyrgð á gerð starfs- og rekstraráætlana og að þær séu samþykktar af háskólaráði og hefur frumkvæði að því að háskólaráð marki sér heildarstefnu í málefnum háskólans. Aðstoðarrektorar eru staðgenglar rektors og gegna störfum í umboði eða forföllum hans.
Rektor hefur ráðningarvald yfir öllum starfsmönnum háskólans. Rektor skal sjá til þess að til séu starfslýsingar fyrir allt starfsfólk háskólans.
4. gr.
Rekstrarstjóri Rektor ræður rekstrarstjóra sem er yfirmaður rekstrar- og þjónustusviðs háskólans og annast fjárreiður hans í umboði rektors. Með sama hætti undirbýr rekstrarstjóri árlega fjárhagsáætlun og hefur eftirlit með því að rekstur háskólans sé í samræmi við gildandi heimildir.
5. gr.
Sviðsstjóri rannsóknamála og rannsóknasvið
Rannsóknir háskóladeildanna mynda rannsóknasvið háskólans. Rektor ræður sviðsstjóra rannsóknamála til tveggja ára sem hefur yfirumsjón með samræmingu rannsóknanna. Hann er jafnframt aðstoðarrektor rannsóknamála. Hann tryggir og gætir lögbundins rannsóknahlutverks gagnvart atvinnuveginum og hefur forgöngu um samstarf og samráð við fulltrúa landbúnaðarins um rannsóknir og rannsóknaþörf. Hann hefur einnig forgöngu um samstarf og samræmingu við aðrar vísindastofnanir í umboði rektors og kallar til deildarforseta, verkefnastjóra rannsóknaverkefna og annað fagfólk skólans sér til fulltingis. Hann hefur heimild til að hafa forgöngu um myndun rannsóknateyma sem eru óháð deildarskiptingu og tryggir að deildir móti sér rannsóknastefnu.
6. gr.
Sviðsstjóri kennslumála og kennslusvið Námsbrautir háskóladeildanna mynda kennslusvið háskólans. Rektor ræður sviðsstjóra kennslumála til tveggja ára sem hefur yfirumsjón með samræmingu námsbrauta. Hann er jafnframt aðstoðarrektor kennslumála. Hann tryggir tengsl við aðrar menntastofnanir og hefur forgöngu um samræmingu námsins. Hann ber einnig ábyrgð á gæðastjórnun námsins (sbr. 14. gr). Hlutverk sviðsstjóra er einnig að afgreiða umsóknir um rannsóknarnám til rektors og tilnefna prófdómara í samræmi við reglur um rannsóknanám. Kennsluskrifstofa annast daglegan rektstur kennslusviðsins undir verkstjórn kennslustjóra.
7. gr.
Deildarforsetar Stjórn háskóladeilda er í höndum deildarforseta sem ráðinn er af rektor til tveggja ára skv. tilnefningu deildarfundar en stjórn starfs- og endurmenntunardeildar er í höndum forstöðumanns sem ráðinn er af rektor. Þeir stjórna, í umboði rektors og háskólaráðs, málefnum hvers fagsviðs háskólans og hafa frumkvæði að mótun stefnu fyrir deildina. Þeir vinna fjárhagsáætlun fyrir deildina í samráði við rekstrarstjóra og gera tillögur um mannahald, aðföng og ábyrgð á rannsóknaverkefnum og kennsluverkefnum í samráði við verkefnisstjóra og námsbrautarstjóra. Háskólaráð samþykkir reglur um kjörgengi deildarforseta og kosningafyrirkomulag.
8. gr.
Námsbrautarstjórar Námsbrautarstjórar eru ráðnir af rektor til tveggja ára skv. tilnefningu deildarfundar. Þeir annast faglega umsjón námsbrauta og hafa eftirlit með framkvæmd kennslu á viðkomandi námsbraut og frumkvæði að þróun og gæðastarfi á vettvangi brautarinnar. Þeir gera tillögur í samvinnu við deildarstjóra um breytingar á námsbrautum og vali á kennurum, bæði fastra kennara og aðfenginna kennslukrafta. Námsbrautarstjóri annast fagleg samskipti við kennara og nemendur sinnar brautar. Námsbrautarstjóri ritstýrir kynningarefni og kennsluskrá sem varðar viðkomandi námsbraut í samráði við kennsluskrifstofu.
9. gr.
Verkefnisstjórar Verkefnisstjórar fara með rekstur einstakra rannsóknaverkefna og stjórn rannsóknateyma. Þeir bera faglega og fjárhagslega ábyrgð á rannsóknaverkefnum gagnvart deildarforseta og fara með manna- og fjárforráð innan þeirra.
10. gr.
Deildarfundir og háskólafundur
Deildarfundur fjallar um fagleg málefni deildarinnar og skal boðað til hans a.m.k. tvisvar á ári. Á deildarfundum eiga sæti allir fastráðnir starfsmenn deildarinnar og tveir fulltrúar nemenda kjörnir til eins árs í senn.
Tilgangur deildarfundar er að:
- vera vettvangur umræðna um markmið og hlutverk deildarinnar
- tilnefna deildarforseta í háskóladeildum (sbr. 15. gr.)
- fjalla um skipulag kennslu, námsframboð og námsleiðir
- fjalla um rannsóknir í háskóladeildum
- upplýsa starfsmenn um ýmis fagleg málefni er snerta deildina
- kjósa í ráð og nefndir og ákveða hlutverk þeirra og skyldur.
Háskólafundur er sameiginlegur deildarfundur allra deilda sem haldinn er minnst árlega í þeim tilgangi að:
- ræða skiptingu fastafjármuna til mismunandi verkefna innan stofnunarinnar
- ræða almenna stefnumótun fyrir stofnunina á vettvangi kennslu og rannsókna
- ræða ýmis önnur málefni stofnunarinnar eftir efnum og ástæðum hverju sinni.
11. gr.
Almennir starfsmannafundir Almennir starfsmannafundir eru haldnir til að ræða málefni háskólans. Rektor boðar til starfsmannafunda eftir þörfum.
12. gr.
Kennslunefnd Kennslunefnd er skipuð sviðsstjóra kennslumála, sem er formaður, kennslustjóra, námsbrautarstjórum og þremur fulltrúum nemenda, úr starfsnámi, grunnnámi og rannsóknanámi. Kennslunefnd fjallar um kennsluskrár fyrir einstakar námsbrautir, mótar reglur um skráningu og eftirlit með framvindu náms, skilgreinir námskröfur, setur meginreglur um námsmat og mat á öðru námi, fylgist með gæðum náms og kennslu og ákveður úrbætur eftir því sem þörf gerist í samvinnu við yfirstjórn háskólans. Jafnframt fjallar kennslunefnd um málefni sem varða tæknileg atriði í námi og kennslusamstarfi við aðrar háskólastofnanir. Kennslunefnd sker úr um ágreiningsmál sem upp kunna að koma í framkvæmd kennslu eða námsmats. Úrskurðum kennslunefndar má áfrýja til rektors.
13. gr.
Um samráð við aðra háskóla og samstarfsstofnanir háskólans Landbúnaðarháskóli Íslands og einstakar deildir hans skulu hafa samráð og samstarf við aðra háskóla til að nýta sem best tiltæka starfskrafta og gagnakost og stuðla með hagkvæmum hætti að fjölbreyttari menntunarkostum í samræmi við lög nr. 57/1999. Leita skal samkomulags við samstarfsaðila um gagnkvæma viðurkenningu námsþátta. Háskólanum er einnig heimilt að gera samstarfssamninga við aðrar stofnanir sem tengjast starfssviði háskólans. Aðstoðarrektorar hver á sínu sviði skulu hafa forgöngu um samstarf og samræmingu í ofangreindum málaflokkum.
14. gr.
Gæðaeftirlit
Í Landbúnaðarháskóla Íslands skal fara fram reglulegt mat á innra starfi háskólans með stöðugar umbætur í huga með skírskotun til innlendrar og erlendrar samkeppnisstöðu og og í samræmi við reglur, sem landbúnaðarráðherra setur, sbr. 5. gr. laga 57/1999 um búnaðarfræðslu, og gildandi lög um háskólanám. Skólanum skal sett umhverfis-, starfsmanna- og jafnréttisstefna.
III. KAFLI
Deildir og faglegir starfsmenn háskólans.
15. gr.
Deildir háskólans Meginverksviðum Landbúnaðarháskóla Íslands er skipt niður á deildir sem hver um sig ber ábyrgð á þeim kennslu- og rannsóknaverkefnum sem tilheyra viðkomandi deild. Deildir Landbúnaðarháskóla Íslands eru þessar:
Auðlindadeild
Meginmarkmið deildarinnar er að viðhalda og þróa íslenskar erfðaauðlindir í búfé og nytjajurtum og byggja upp sjálfbær framleiðslukerfi sem tryggi gæði og rekjanleika afurðanna frá framleiðanda til neytanda. Kennslu- og rannsóknaviðfangsefni eru meðferð, ræktun og nýting gróðurs og lands, búfjár og ferskvatnsdýra til framleiðslu matvæla og annarrar atvinnu- og verðmætasköpunar, þar með taldir líffræðilegir, hagrænir og tæknilegir þættir.
Umhverfisdeild
Meginmarkmið deildarinnar er að þróun landnýtingar sé náttúrulega, félagslega og efnahagslega sjálfbær og vinni með fjölbreytileika mannlífs og náttúru. Kennslu- og rannsóknaviðfangsefni taka til náttúruauðlinda, nýtingar þeirra, skipulags og byggðaþróunar.
Deildir háskólans skulu hafa með sér náið samstarf, t.d. með teymishópum þvert á deildir sem hafa það m.a. að markmiði að örva faglega umræðu og leggja drög að nýjum rannsóknaverkefnum. Einnig skal með samnýtingu mannafla, tilraunaaðstöðu, kennslutækja og annarrar aðstöðu stefnt að því að efla fjölbreytt vísindastarf og tryggja hagkvæmni í rekstri.
Starfs- og endurmenntunardeild
Starfs- og endurmenntunardeild er sjálfstæð deild innan Landbúnaðarháskóla Íslands sem annast starfs- og endurmenntun á fagsviðum stofnunarinnar. Stjórn deildarinnar er á vegum forstöðumanns en undir hann heyra námsbrautarstjórar, sem bera ábyrgð á faglegri umsjón námsbrauta (sbr. 8 gr.), og endurmenntunarstjóri, sem annast daglegan rekstur endurmenntunarnámskeiða. Um hlutverk deildarfundar vísast til 10. gr.
Sjá Sarfsreglur LbhÍ Háskóladeildir
Sjá Starfsreglur LbhÍ Starfsmenntadeild
Sjá Reglur Landbúnaðarháskóla Íslands um doktorsnám16. gr.
Faglegir starfsmenn Við Landbúnaðarháskóla Íslands starfa prófessorar, dósentar og lektorar. Þeir starfa við kennslu, rannsóknir, stjórnun og/eða önnur þau verkefni sem þeim eru falin af rektor og deildarforsetum og almennt falla undir starfssvið háskóla. Heimilt er að ráða aðra starfsmenn til sérhæfðra starfa. Heimilt er að ráða kennara við starfs- og endurmenntunardeild sem ekki fullnægja skilyrðum til háskólakennslu sbr. 28. gr. laga nr. 57/1999. Um starfsskyldur og réttindi starfsmanna fer að öðru leyti eftir kjarasamningum og nánari ákvæðum í lögum og reglugerðum.
17. gr.
Um rannsóknaleyfi Rektor er heimilt að veita fastráðnum starfsmönnum háskólans rannsóknaleyfi í samræmi við sérstakar reglur þar um.
IV. KAFLI
Rekstrar- og þjónustusvið
18. gr.
Við Landbúnaðarháskóla Íslands er rekstrar- og þjónustusvið undir forystu rekstrarstjóra. Undir sviðið heyrir m.a. almenn skrifstofa, starfsmannahald, fjármál, umsjón fasteigna og rekstur stoðeininga eins og upplýsinga- og bókasafn, tilrauna- og kennslubú og þjónustuefnagreiningar.
V. KAFLI
Nemendur, kennsla og próf.
19. gr. Núverandi reglur um nemendur, kennslu og próf og skipan námsbrauta gilda þar til rektor og háskólaráð taka ákvörðun um annað.
VI. KAFLI
Gildistaka o.fl.
20. gr.
Reglur þessar eru settar samkvæmt heimild í lögum nr. 57/1999 ásamt lögum um breytingu á framangreindum lögum nr. 71/2004 og öðlast þegar gildi. Þær skal endurskoða eigi síðar en eftir tvö ár frá undirskrift þeirra.
Þannig samþykkt af háskólaráði þann 16. febrúar 2005.
Reykjavík, 16. febrúar 2005
_______________ _________________
Ágúst Sigurðsson
|