ÁFANGALÝSINGAR
Áfangalýsingar
Tekið skal fram að allir áfangar 1. annar eru undanfarar 2. annar og allir áfangar 1. og 2. annar eru undanfarar 3. annar. Sama er að segja um áfanga 3. annar sem allir eru undanfarar 4. annar. Fjarnemar eru undanþegnir þessu ákvæði en þurfa að kynna sér undanfara hvers áfanga og haga námi sínu samkvæmt því.
Áfangalýsingum er raðað eftir önnum. Fram kemur númer og heiti áfanga og hvort um skyldu- eða valáfanga er að ræða. Þá er getið um kennara/ábyrgðaraðila og kennsluefni þar sem það er vel afmarkað (sé víða leitað fanga eða mikið af tilvísunum í greinar og ljósrit er upptalningu sleppt). Lýsing áfangans tekur yfir megináherslur og er nánar útfærð í kennsluáætlun sem nemendur fá í upphafi hverrar annar.
1. ÖNN (í skóla)
BFR 103 Búfjárrækt Skylduáfangi
Kennari: Sverrir Heiðar, B.S., sverrir@lbhi.is
Kennsluefni: Búfjárrækt; Runólfur Sigursveinsson, Sverrir Heiðar
Mjaltir og Mjólkurgæði; BÍ 1997.
Markmið: Að gefa nemendum yfirlit yfir helstu atriði í almennri búfjárrækt hvað varðar fóðrun, hirðingu, afurðir og markaðsstöðu.
Lýsing: Fjallað er um grundvallaratriði í fóðurfræði og helstu fóðurefni kynnt. Gefið er yfirlit um meltingarstarfsemi jórturdýra og einmaga dýra. Kynntar eru helstu fóðurtegundir og notagildi þeirra. Tekin er fyrir ræktun, fóðrun og hirðing nautgripa, sauðfjár og hrossa. Helstu búfjársjúkdómar eru kynntir. Sérstök áhersla er lögð á fóðurútreikninga.
Fjallað er um mjaltir og lífeðlisfræðilega þætti tengda þeim, uppbyggingu og starfsemi júgursins. Farið er yfir gerð og starfsemi mjaltavélarinnar og tæknileg atriði þar að lútandi skoðuð og samspil þeirra við hina líffræðilegu þætti athuguð. Hluti áfangans eru verklegar æfingar á skólabúi Landbúnaðarháskólans.
BST 102 Bókhald 1 Skylduáfangi
Kennari: Stefanía Nindel B.S., stefania@lbhi.is
Kennsluefni: Tómas Bergsson, 1994. Bókfærsla 1.-A. Idnú.
Markmið: Að nemendur kynnist grundvallaratriðum bókhalds og öðlist færni í að vinna með bókhaldsgögn.
Lýsing: Farið er í grundvallaratriði tvöfalds bókhalds og lokun bókhalds. Unnin allmörg verkefni við að færa dagbók eftir fylgiskjölum og við uppgjör með reikningsjöfnuði. Kynnt uppsetning rekstrar- og efnahagsreiknings, samspil þeirra, ásamt helstu hugtökum reikningshalds.
BÚT 103 Búvélafræði 1 Skylduáfangi
Kennari: Haukur Þórðarson, haukur@lbhi.is og
Jóhannes Ellertsson, vélvirki, joi@lbhi.is
Kennslugögn: Rafn Sigurðsson. 2002. Öryggismál vinnustaða, Manniche, J, og Rasmussen, B. 1997 Traktor- og Motorlære. 3. útg., Vinnueftirlit Ríkisins. Frumnámskeið. Annað efni sem dreift verður og bent á samhliða kennslu.
Markmið: Að nemendur þekki helstu reglur sem lúta að vinnuvélanotkun og fái æfingu í að stjórna vélum og tækjum sem notuð eru við landbúnað. Nemendur skulu að áfanga loknum hæfir til að sækja um réttindi skv. “Vinnuvélanámskeiði fyrir dráttavélar og minni jarðvinnuvélar” (til Vinnueftirlits ríkisins).
Lýsing: Dráttarvélin er kynnt til bústarfa og annarra starfa, svo og þær vélar er falla undir flokk I hjá Vinnueftirliti ríkisins. Einnig er fjallað um lög og reglugerðir er varða vinnuvélar almennt. Sérstaklega er dráttarvélin kynnt og innviðir hennar svo sem aflvél, orkunýting, drif, vökvabúnaður, tengingar, aðbúnaður ekils og stöðugleiki. Þá eru verklegar æfingar og sýnikennsla er varða dráttarvélar. Í öryggisfræðinni eru kynnt lög um öryggi og hollustuhætti á vinnustöðum. Fjallað m.a um vinnustaði, hávaðamengun, loftmengun, meðferð hættulegra efna, hreyfifræði, atvinnusjúkdóma, orsakir vinnuslysa, brunavarnir og skyndihjálp. Námsgreinin gefur bókleg réttindi og próftökurétt hjá Vinnueftirliti m.a. á dráttarvélar og minni jarðvinnuvélar allt að 6 tonnum samkvæmt reglum um réttindi til að stjórna vinnuvélum.
EFN 113 Almenn efnafræði Skylduáfangi
Kennari: Eyjólfur Örnólfsson B.S., eyjo@lbhi.is
Kennsluefni: Jóhann Sigurjónsson. 1995. Efnafræði I. Rvík, Iðnú.
Markmið: Að nemendur kunni skil á þeim þáttum efnafræði sem nauðsynlegir eru sem undirstaða fyrir áburðar-, jarðvegs- líffræði og fleiri námsgreinar sem kenndar eru í búfræðinámi.
Lýsing: Nemandinn á að loknum þessum áfanga að hafa öðlast nokkurn skilning á frumatriðum efnafræðinnar, byggingu frumeinda (atóma) og uppbyggingu lotukerfisins. Þá á nemandinn að skilja og geta beitt helstu grunnhugtökum greinarinnar og kunna skil á efnatengjum, efnahvörfum og efnasamböndum. Lögð er áhersla á að nemandinn geti reiknað út mólstyrk lausna og efnainnihald einstakra frumefna í efnasamböndum, t.d. köfnunarefnisinnihald í kjarna. Sérstök áhersla er lögð á að kynna grunnhugtök í lífrænni efnafræði.
JRT 123 Jarðvegur og nytjajurtir Skylduáfangi
Kennarar: Árni Brynjar Bragason, B.S., arni@lbhi.is og
Stefanía Nindel B.S., stefania@lbhi.is
Kennsluefni: Þorsteinn Guðmundsson. 1994. Jarðvegsfræði. Rvík, BÍ.
Ríkharð Brynjólfsson. 2000. Nytjajurtir
Markmið: Að nemandi kunni skil á þeim þáttum jarð- og jarðvegsfræði sem lúta að landbúnaði. Einnig að nemandi þekki helstu nytjaplöntur og kunni skil á byggingu þeirra, helstu vaxtarþáttum og nýtingarmöguleikum hérlendis.
Lýsing: Áfanginn skiptist í eina einingu í jarðvegsfræði og tvær í nytjajurtum.
Fjallað verður um berggrunn Íslands og jarðveg, gerð hans og eiginleika. Einkennum góðs ræktunarjarðvegs gerð skil. Farið í framkvæmd og áhrif framræslu, jarðvinnslu og kölkunar jarðvegs.
Í nytjajurtum er farið í ræktun og nýtingu plantna í íslenskum landbúnaði. Áhersla er lögð á vaxtaþætti, líffræði og flokkunarkerfi plantna, grasrækt og nýtingu grasa í túni, belgjurtir, grænfóður og korn. Einnig er fjallað um sáðskipti. Rætt er um frærækt, jurtakynbætur og tegundaval m.t.t. markmiðs ræktunar. Þá er gefið stutt yfirlit yfir markmið og aðferðir við landbætur í útjörð og helstu tegundir sem notaðar eru til landgræðslu kynntar.
MLS 102 Málmsuða Skylduáfangi
Kennari: Jóhannes Ellertsson, vélvirki, joi@lbhi.is
Markmið: Að nemendur kynnist logskurði og log- og rafsuðu og verð færir um að bjarga sér með einfalda járnsmíðavinnu.
Lýsing: Gerð grein fyrir notkun acetylen-gass og súrefnis til málmsuðu og logskurðar. Farið yfir flokkun og stöðlun á húðun rafsuðuvíra. Kynnt súrefnis- og gashylki og meðferð þeirra. Allir hlutar logsuðutækja og notkunarsvið kynntir. Gerðir rafsuðuvéla kynntar, eiginleikar þeirra og notkunarsvið. Öryggisþættir varðandi log- og rafsuðu kynntir. Verklegar æfingar: lárétt og lóðrétt logsuða og logskurður. Lóðun með kopar- og silfurslaglóði.
TÖL 102 Upplýsingasamfélagið Skylduáfangi
Kennari: Sverrir Heiðar, B.S., sverrir@lbhi.is
Kennsluefni: Ingibjörg Axelsdóttir og Þórunn Blöndal. 2003. Handbók um ritun og frágang. Rvík, Iðunn. Einnig handbækur um ýmis notendaforrit. Lög og reglur er lúta að landbúnaði.
Markmið: Að nemandinn verði fær um að nýta sér tölvutæknina til framsetningar efnis og kunni að afla sér upplýsinga með sem fjölbreytilegustum hætti. Að nemandinn geti tjáð sig í ræðu og riti og þekki lög og reglur sem lúta að atvinnugreininni.
Lýsing: Fjallað er um og lög og reglur sem landbúnað varða. Nemendur eru þjálfaðir í að koma fyrir sig orðum í ræðu og riti. Þeir fá þjálfun í notkun ritvinnslu, töflureikna, kynningarforrita, tölvupóstforrita, og annara forrita sem að gagni mega koma við framsetningu efnis og í náminu almennt. Upplýsingaöflun þjálfuð bæði með heimildaleit á bókasafni og með aðstoð tölvutækninnar.
BFR 132 Hrossarækt 1 Valáfangi
Kennari: Magnús Lárusson, M. Ag. maggilar@lbhi.is
Markmið: Að gera nemanda hæfan til að ná 1. og 2. stig í knapamerkjakerfi “Átaksverkefnis í hrossarækt”.
Lýsing: Nemendum er kennt 1. og 2. stig knapamerkjakerfisins og unghrossamat. Efni 1. og 2. stigs knapamerkjakerfisins er m.a. eðli hestsins og umgengni við hann, reiðtygi, gerð og umhirða. Nemendur eru þjálfaðir í að ríða fet og brokk. Hver nemandi þarf að koma með hest sem hentar til náms á þessu stigi knapamerkjakerfisins. Hesturinn þarf að vera taminn og þjáll á feti, brokki, stökki og tölti. Nemendur læra að gera unghross leiðitöm, og meta útlit, hreyfingar og geðslag þeirra. Nemendur taka þátt í hirðingu kennsluhrossa.
BFR 182 Annað búfé Valáfangi
Kennari: Edda Þorvaldsdóttir, B.S., edda@lbhi.is
Kennsluefni: Nemendur fá ljósrit og samantekið efni frá kennara. Bók Jóns Torfasonar Melrakki útg. 2002 er stuðningsrit í áfanganum.
Markmið: Að nemandinn þekki lífsferil, hirðingu, fóðrun og afurðir svína, alifugla, loðdýra, geita o.fl. búpenings sem til greina kemur að rækta við hérlendar aðstæður.
Lýsing: Fjallað er um svínarækt í landinu fyrr og nú, aðbúnað, hirðingu og nytjar. Líffræði fugla tekin til umfjöllunar og hænsnarækt, anda-, kalkúna- og gæsaeldi skoðað m.t.t. afurða og umönnunar fyrr og nú. Loðdýrarækt gerð nokkur skil, aðallega minka-, refa- og kanínurækt. Geitfjárrækt kynnt, saga hennar skoðuð og framtíðarhorfur hérlendis. Aðeins verður komið inn á strútaræktun, býflugnarækt og annan óhefðbundinn búsmala sem lítt eða ekkert hefur verið ræktaður hérlendis, þó hugmyndir hafi vaknað þar um.
LND 162 Hlunnindi og nýsköpun Valáfangi
Kennari: NN
Kennsluefni: Nemendur fá ljósrit og samantekið efni frá kennara
Markmið: Að nemandi þekki til hlunninda á Íslandi og nýtingar þeirra. Einnig að nemandi öðlist færni í að vinna með nýjar hugmyndir frá upphafi til markaðssetningar.
Lýsing: Fjallað er um hlunnindi í víðum skilningi, með megináherslur á þau hlunnindi sem oft fylgja bújörðum. Skoðaðir eru möguleikar á nýtingu slíkra hlunninda og rædd umhirða og viðhald sem fylgir nýtingu þeirra.
Í nýsköpunarhlutanum er fjallað um hugmyndaleit, val hugmynda, gerð áætlana sem til þurfa að koma svo hugmynd verði að veruleika (svo sem viðskipta-, framkvæmda-, stofnkostnaðar-, markaðs-, framleiðslu- og fjárhagsáætlana). Kynningarmál og sölumennska í sambandi við nýsköpun tekin til umfjöllunar.
Nýsköpnunarsjóður, Framleiðnisjóður landbúnaðarins og fleiri styrktaraðilar sem leita má liðsinnis hjá í tengslum við atvinnuskapandi hugmyndir, kynntir.
Nemendur vinna áætlanir út frá eigin hugmyndum.
2.ÖNN – (fyrri hluti í skóla, síðari hluti á kennslubúi)
BFR 112 Hirðing og aðbúnaður búfjár Skylduáfangi
Kennari: Helgi Björn Ólafsson B.S., helgibj@lbhi.is
Kennsluefni: Ljósrit og ýmis gögn og reglugerðir sem kennari vísar á.
Markmið: Að nemandi sé fær um almenna hirðingu algengustu búfjártegunda og kunni skil á lögum og reglum er varða búfjárhald.
Lýsing: Fjallað um hirðingu og aðbúnað helstu búfjártegunda. Kynnt lög og reglugerðir er lúta að búfjárhaldi. Vikið að atferli og hegðunarmunstri búfjár. Fjallað um kröfur til búpeningshúsa og annars aðbúnaðar í búfjárrækt. Gerð grein fyrir þeim þáttum er máli skipta við almenna hirðingu og umgengni við búpening. Verklegar æfingar í útihúsum og víðar.
112 Bókhald 2 Skylduáfangi
Kennari: Stefanía Nindel B.S., stefania@lbhi.is
Kennsluefni: Tómas Bergsson, 1995. Bókfærsla 1.-B. Iðnú.
Markmið: Að nemandi sem tekið hefur Bókhald 1 öðlist meiri færni í bókhaldi, geti sett upp tölvubókhald og nýtt sér bókhaldsforrit. Að nemandi kynnist gerð skattframtals og kunni skil á lögum er að því lúta.
Lýsing: Áframhaldandi bókfærsla. Við bætast millifærslur, launabókhald, birgðareikningur o.fl. Farið er í uppsetningu tölvubókhalds og nemendur kynnast bókhaldsforritinu dkBúbót. Nemendum er ætlað að vinna allnokkur verkefni í færslu bókhalds og uppsetningu ársreikninga í dkBúbót. Farið verður í skattskil, s.s. lög um tekju- og eignaskatt, launaframtal, reiknað endurgjald og landbúnaðarframtal með öllu tilheyrandi.
BÚT 212 Fóðurverkun Skylduáfangi
Kennari: Sverrir Heiðar, B.S., sverrir@lbhi.is
Kennsluefni: Bjarni Guðmundsson. 2002. Heyverkun. Ljósrit og ýmis gögn.
Markmið: Að nemandi öðlast þekkingu á þeim þáttum sem ráða mestu um fóðurgildi og verkun fóðurjurta til vetrarforða og öðlist skilning á því hvernig nýta má áhrifaþættina til þess að afla og verka fóður sem er viðunandi að magni og gæðum.
Lýsing: Fjallað er um heygæði og heyát, gæðastjórnun við heyöflun, efnatap við verkun og geymslu, hollustu heysins, meðferð þess á velli, votheysgerð, verkun heys í plasti og súgþurrkun. Þá er að nokkru fjallað um verkun annarra fóðurjurta en grasa.
JRT 133 Áburðarfræði og plöntuvernd Skylduáfangi
Kennari: Árni Brynjar Bragason, B.S., arni@lbhi.is og
Edda Þorvaldsdóttir, B.S., edda@lbhi.is
Kennsluefni: Magnús Óskarsson. 1994 Áburðarfræði, Rvík, BÍ.
Magnús Óskarsson. 1994. Plöntuvernd
Edda Þorvaldsdóttir - Yfirlit yfir plöntulyf...(handbók)
Markmið: Að nemandi hafi þekkingu til að meta áburðarþarfir og velja áburðartegundir og -magn sem hentar hverju sinni. Að nemandi kunni skil á meindýrum og illgresi sem til er hérlendis og geti af þekkingu varist tjóni af þessum völdum í almennri ræktun.
Lýsing: Áfanginn skiptist í tvær einingar í áburðarfræði og eina í plöntuvernd.
Í áburðarfræðinni er fjallað um næringarefni plantna, bindingu þeirra og losun úr jarðvegi - upptöku og nýtingu í plöntunni. Getið um helstu tegundir tilbúins áburðar, sem notaðar eru í landbúnaði utan gróðurhúsa og litið á framboð hjá einstökum áburðarsölum. Rætt um búfjáráburð og eiginleika hans. Gerð grein fyrir meðferð, nýtingu og áhrifum áburðar - bæði búfjáráburðar og tilbúins áburðar. Nemendur vinna áburðaráætlun fyrir eitt býli og kynnt eru tölvuforrit til hjálpar við hana. Áætlanagerð er þjálfuð enn frekar í tengslum við skylduverkefni sem unnið er í námdvöl.
Í plöntuvernd eru teknir til umfjöllunar helstu skaðvaldar við ræktun nytjaplantna, bæði dýr og jurtir. Farið í meðferð eiturefna - kynnt þau efni sem helst eru notuð til gróðurverndar og gróðureyðingar og gerð grein fyrir öðrum aðgerðum sem að gagni mega koma. Helstu þáttum er varðar ræktun grænmetis og rótarávaxta gerð skil.
LND 102 Umhverfisfræði Skylduáfangi
Kennari: Ragnhildur Sigurðardóttir, M.Sc., ragnhildurs@lbhi.is
Kennsluefni: Sjöberg og Thunberg. 1996 Umhverfisbókin. Rvík, MM. Ásamt fleiri gögnum.
Markmið: Að nemandi þekki hugtök visfræðinnar og geti af þekkingu tekist á við margvísleg umhverfismál, ekki síst í tengslum við landbúnað.
Lýsing: Kynnt eru grunnatriði vistfræði. Gefið yfirlit yfir stöðu umhverfismála í dag; almennt á jörðinni, á Íslandi og í íslenskum landbúnaði. Nemendur eru fræddir um helstu hættur í umhverfismálum og hvernig megi bregðast við þeim. Farið er yfir helstu umhverfisáhrif af völdum landbúnaðar. Sérstök áhersla er lögð á menningarlandslag og skipulagsmál.
Fjallað er um hagsmunaárekstra sem geta orðið milli þeirra sem nýta vilja landið og fá nemendur þjálfun í lýðræðislegum vinnubrögðum við lausn slíkra mála. Í áfanganum er stutt kynning á mati á umhverfisáhrifum og heimspeki náttúruverndar.
NDL 101, 112, 122, 133, Námsdvöl Skylduáfangar
Kennari: Sigtryggur Björnsson B.S., sigtryggur@lbhi.is
Markmið: Að nemandi öðlist aukna þekkingu á búrekstri og afli sér skilnings á landbúnaði, sem nauðsynlegur er til að geta stundað arðsaman búskap.
Lýsing: Hluti Búfræðinámsins er námsdvöl á kennslubúi, fjarri heimabyggð. Nemandi á að taka þátt í öllum störfum, sem unnin eru á búinu eins og hver annar heimilismaður. Honum er ætlað að skila eðlilegu dagsverki, sem skiptist í starfsþjálfun og bóklegt nám. Nemandanum skal gefinn kostur á að vinna sjálfstætt að bústörfum eftir því sem reynsla hans leyfir. Námsdvöl hefst í aprílmánuði og er 13 vikur eða 91 dagur, þar af eru 12 frídagar. Nemandinn skal vera búinn að taka a.m.k. 6 frídaga áður en kemur að prófinu á kennslubúinu, sem er alla jafna ekki fyrr en 60 dagar eru liðnir af námsdvalartímanum.
NDL 101 Ástundun
Lýsing: Hér er um að ræða áfanga sem samanstendur af ástundun, hegðun, og áhuga. Ástundun gefur til kynna iðni nemandans við bóklegt nám en hegðun og áhugi er mat bóndans á samstarfinu við hann.
NDL 112 Námsdvöl 1
Lýsing: Mat á starfshæfni nemandans og fræðilegri þekking hans á viðkomandi starfi. Munnlegt og verklegt próf.
NDL 122 Námsdvöl 2
Lýsing: Mat á starfshæfni nemendans og fræðilegri þekkingu á því starfi sem hann er prófaður í. Munnlegt og verklegt próf.
NDL 133 Mat á þekkingu
Lýsing: Mat á starfshæfni nemandans og þekkingu hans á rekstri kennslubúsins bæði hvað varðar búfræðileg og hagfræðileg atriði. Munnlegt og verklegt próf.
3. ÖNN (fyrri hluti á kennslubúi, síðari hluti í skóla)
NDL 203 Dagbók Skylduáfangi
Ábyrgð: Sigtryggur Björnsson B.S., sigtryggur@lbhi.is
Markmið: Að þjálfa nemandann að gera með skýrum og skipulögðum hætti grein fyrir áreiti hversdagsins og efla með honum hæfni til þess að tjá sig í rituðu máli sér í lagi um málefni þau er snerta íslenskan landbúnað.
Lýsing: Nemandi skal færa ítarlega dagbók á námsdvalartímanum þar sem fjallað er um búreksturinn á degi hverjum, framgang hans og tilgang, einnig skal geta helstu viðburða líðandi stundar á kennslubúinu og í þjóðfélaginu. Þá eru landbúnaðarmál sjálfsagt viðfangsefni dagbókar.
Safna á einnig nákvæmum upplýsingum um veðurfar. Þá kynnir nemandinn sér sögu þess héraðs sem hann dvelur í svo og stjórnkerfi sveitarfélaga og viðfangsefni þeirra. Skrásetja skal þann tíma sem varið er til hvers verks. Dagbók á að skila í lok námsdvalar.
NDL 215 Verkefni, skoli.is Skylduáfangi
Ábyrgð: Kennarar í jarðarækt, búfjárrækt bókhaldi og umhverfisfræði.
Markmið: Að nemandi öðlist færni í að nýta þekkingu sína í búfræði við úrlausn raunverulegra verkefna.
Lýsing: Unnin eru verkefni sem tengjast námi á 1. ári og búrekstri á kennslubúinu. Leiðbeiningar fara fram í gegnum kennsluvef skólans. Verkefnin eru fjórþætt og nánar skilgreind við upphaf námsdvalar:
1. Jarðrækt. 1,5 einingar.
Hér er um að ræða verkefni, sem tengjast jarðrækt á kennslubúinu.
2. Búfjárrækt. 2 einingar.
Hér velur nemandinn búgrein, annað hvort nautgriparækt, sauðfjárrækt, eða báðar. Ef hann hefur tekið hrossarækt I á 1. önn, má hann velja 1 einingar verkefni sem tengist henni og svo hina eininguna annað hvort úr nautgriparækt eða sauðfjárrækt.
3. Bókhald og skattskil. 1 eining.
Nemendur nýta þá þekkingu, sem þeir hafa á þessum málum til að kynna sér rekstur kennslubúsins.
4. Umhverfisfræði. 0,5 einingar.
Undir þessum lið verða unnin verkefni tengd umhverfis- og skipulagsmálum á búinu og í byggðarlaginu.
Kennari á Hvanneyri og verknámsbóndinn bera ábyrgð á leiðbeiningum og kennslu varðandi þessi verkefni og kennarinn annast námsmatið.
NDL 222 Plöntusafn Skylduáfangi
Kennari: Stefanía Nindel B.S., stefania@lbhi.is
Markmið: Að nemandi læri að greina plöntur með aðstoð tiltækra hjálpartækja og geti sett upp gagnmerkt safn þurrkaðra plantna.
Lýsing: Nemandinn á að safna minnst 45 tegundum íslenskra plantna samkvæmt nánari leiðbeiningum í vinnubók. Söfnun, greining og þurrkun fer fram að sumri en frágangur safnsins að hausti. Námsmat er tvíþætt, plöntusafn 75% og munnlegt próf 25%.
BST 202 Bústjórn 1 Skylduáfangi
Kennari: Stefanía Nindel B.S., stefania@lbhi.is
Kennsluefni: Stefanía Nindel, 2004. Bústjórn I. LBH.
Markmið: Að gera nemanda færan um að meta afkomu og fjárhagsstöðu fyrirtækis með hliðsjón af ýmsum kennitölum.
Lýsing: Fjallað um helstu kenningar og hugtök við fjármálastjórnun, svo sem grundvallarhugtök reikningshalds, tekjur/gjöld, innborganir/útborganir og almenn kostnaðarhugtök. Samspil kostnaðar, framleiðslumagns og hagnaðar eru rannsökuð í verðbókhaldi. Farið er í greiningu fyrirtækja með kennitölum. Unnið með niðurstöðum búreikninga.
LBF 103 Líffæra-, lífeðlis- og fóðurfræði Skylduáfangi
Kennari: Edda Þorvaldsdóttir, B.S., edda@lbhi.is
Kennsluefni: Edda Þorvaldsdóttir. 2001. Líffræði búfjár. LBH. Ásamt fleiru
Markmið: Að nemandi þekki líffærabyggingu og lífsstarfsemi búfjár, kunni skil á æxlunar- og vaxtarlífeðlisfræði spendýra og sé fær um að fóðra búpening af kunnáttu
Lýsing: Fjallað um gerð og starfsemi meltingarfæra einmaga- og jórturdýra. Gerð grein fyrir niðurbroti, upptöku og nýtingu meginnæringarefna, steinefna og vítamína auk þess sem fjallað er um einstök fóðurefni og varnir gegn ýmsum kvillum sem orsakast af rangri fóðrun. Fóðurmat og fóðurmatskerfi tekin til umfjöllunar og notkun þeirra gerð nokkur skil. Þá er fjallað um gerð og starfsemi vöðva, beina og tanna búfjár. Helstu skynfærum gerð skil hvað varðar gerð og starf. Fjallað er um blóð og blóðrás og loftskipti öndunar. Temprun líkamans og þau líffæri sem henni tengjast tekin til umfjöllunar. Húð, hár, horn og hófar, gerð og starf. Í æxlunar- og vaxtarlífeðlisfræði er fjallað um æxlun, fósturmyndun, vöxt og þroska helstu búfjártegunda.
LBF 202 Erfða- og kynbótafræði Skylduáfangi
Kennari: Magnús Lárusson, M. Ag. maggilar@lbhi.is
Kennsluefni: Emma Eyþórsdóttir. 2004. Erfða- og kynbótafræði. LBH.
Markmið: Að nemandi þekki grundvallaratriði erfða- og kynbótafræðinnar og geti beitt þekkingu sinni í kynbótum í eigin búskap.
Lýsing: Fjallað um lögmál Mendels, erfðavísa, ríkjandi og víkjandi erfðir svo og flutning erfðaefnis milli kynslóða ásamt jafnaskiptingu og rýriskiptingu fruma. Gerð og verkun erfðavísa, uppbyggingu DNA, röðun erfðavísa, stökkbreytingar og grunnatriði erfðatækni. Fjallað um samstæða og samverkandi erfðavísa. Kynferði og kyntengdar erfðir skýrðar. Gerð grein fyrir erfðabreytileika, magnbundnum erfðum, umhverfisbreytileika og arfgengi.
Skráning og söfnun upplýsinga, úrvalsaðferðir og kynbótamat tekið til umfjöllunar auk þátta sem hafa áhrif á erfðaframfarir. Þá er fjallað um kynbótaskipulag útfrá mismunandi forsendum, kynbótaeinkunnir og kynbótaspár. Áhersla er lögð á að kynna efnið með dæmum úr íslenskum landbúnaði
BFR 413 Nautgriparækt 1 Bundið val
Kennari: Sverrir Heiðar, B.S., sverrir@lbhi.is
Kennsluefni: Sveinn Guðmundsson. 1996. Hraustar kýr
Alfnes, T. og Österås, O. 1997. Mjaltir og mjólkurgæði (BÍ).
Ýmis ljósrit sem kennari afhendir.
Markmið: Að nemandi kynnist stöðu nautgriparæktar í heiminum. Verði fær um að sinna hirðingu nautpenings og kunni skil á helstu þáttum er lúta að mjöltum og tækni við þær.
Lýsing: Kynnt eru helstu kúakyn. Fjallað er um fóðurþarfir, uppeldi, fóðrun og hirðingu mjólkurkúa á mismunandi tímabilum og gerðar fóðuráætlanir. Nemendur gera úttekt á fóðrun í Hvanneyrarfjósi. Farið er í ferli mjólkurmyndunar, mjaltir, efnainnihald mjólkur og kynntir þættir sem þar hafa áhrif. Rætt er um ungkálfa, val á kvígum og uppeldi þeirra. Fjallað um atferli, frjósemi, sjúkdóma og heilbrigði nautgripa. Þá er farið í skýrsluhald í nautgriparækt.
BFR 423 Sauðfjárrækt 1 Bundið val
Kennari: Árni Brynjar Bragason, B.S., arni@lbhi.is
Kennsluefni: Ljósrit og ýmis gögn sem kennari vísar á eða afhendir
Markmið: Að nemandinn þekki til íslensks sauðfjárbúskapar og verði fær um að sinna hirðingu sauðfjár.
Lýsing: Sérkenni íslenska fjárstofnsins og saga íslenskrar sauðfjárræktar. Fjallað um mörk og merkingar. Ítarlega er fjallað um fóðrun og hirðingu sauðfjár á öllum aldri. Fjallað um sjúkdóma í ám og lömbum og hvernig má bregðast við þeim. Kjötgæði og kjötmat ítarlega tekin fyrir. Sumar- og síðslátrun lamba, sveigjanlegur burðar- og sláturtími. Grundvöllur kynbótastarfsins og skipulag þess kynnt. Ull og gærur. Frjósemi, sauðfjár, sæðingar áa og samstilling gangmála. Nemendur vinna ritgerð um sauðfjárrækt á tilteknu býli, sem þeir velja sjálfir. Verkleg þjálfun í sauðfjárdómum, ullarmati, mati á líflömbum og sláturlömbum. Notkun ómsjár kynnt.
BFR 432 Hrossarækt 2 Valáfangi
Kennari: Þorvaldur Kristjánsson, M. Sc. thorvaldurk@lbhi.is
Markmið: Þessi áfangi er hugsaður sem yfirlitsáfangi í hrossarækt og er ætlað að kynna fyrir nemendum helstu undirstöðuatriði hrossaræktar Að gera nemanda hæfan til að ná 3. stigi í knapamerkjakerfi..
Lýsing: Farið yfir fóðrun og helstu fóðurefni og nemendur læra að meta holdarfar hrossa. Ræktun íslenska hestsins og framkvæmd hennar er tekin fyrir, og saga hrossaræktar á Íslandi. Nemendur kynnast kynbótadómum hrossa. Farið verður yfir skýrsluhald í hrossarækt. Þá læra nemendur um helstu hrossasjúkdóma og æxlunarfræði. Auk þess er nemendum kennt um þróun hestsins, önnur hestakyn, gangtegundir, liti og litaerfðir hrossa. Verklegir og bóklegir tímar eru í járningum hrossa. Í þessum áfanga er kennt allt það sem telst bóklegt í 3. stigi knapamerkjakerfisins, en það sem telst verklegt í því stigi er kennt í hrossarækt 3.
Sláturhúsastörf Valáfangi
Kennari: NN
Markmið: Að nemandi kynnist slátrunarferli sem flestra búfjártegunda og þekki grundvallaratriði varðandi meðferð sláturafurða.
Lýsing: Kynnt lög um dýravernd, reglur um meðferð og flutning sláturdýra. Fjallað er um gamlar matarvenjur og geymsluaðferðir þeim tengdar. Gerð grein fyrir eðliseiginleikum kjöts, geymslu þess, áhrifum frystingar og kælingar á meyrnun og gæði kjöts. Matargerð úr innmat er kynnt. Gærugæði, áhrif hæklunar og fyrirristu og geymslu á verðmæti gærunnar. Farið er í sláturhús, mismunandi vinnslulínur kynntar og farið yfir kjötmat mismunandi búfjártegunda.
BFR 452 Ullariðn Valáfangi
Kennari: Jóhanna Pálmadóttir
Markmið: Að nemandi verði fær um að vinna ull frá rúningi í fatnað með nokkrum algengum aðferðum.
Lýsing: Kynnt er eðli íslensku ullarinnar, sérkenni hennar og möguleikar til nýtingar. Ýmsar úrvinnsluaðferðir verða kynntar. Grófhreinsun reyfis og pökkun. Nemendur læra að nýta íslensku ullina til handiðnar. Farið er í þvott, ofanaftekt, kembingu og spuna. Æfð er ýmis konar bandgerð, tekin fyrir úrvinnsla, t.d. prjón, vefnaður og flókagerð, auk þess sem farið er í grundvallaratriði hönnunar. Stór hluti áfangans er verklegur.
BFR 462 Kanínurækt Valáfangi
Kennari: Sverrir Heiðar, B.S., sverrir@lbhi.is
Kennsluefni: Ingimar Sveinsson. 1988. Loðkanínurækt.
Sverrir Heiðar. Drög að kennsluefni í kanínurækt.
Markmið: Að nemandi kynnist kanínurækt og geti hirt um kanínur til afurðamyndunar.
Lýsing: Kynntir eru möguleikar á kanínurækt sem búgrein. Fjallað um notagildi og einstök afbrigði með aðaláherslu á feldkanínur og loðkanínur. Kynnt eru markaðsmál tengd afurðum þeirra. Ítarlega er fjallað um meltingu, fóðrun og hirðingu ásamt kröfum þeim sem kanínur gera um húsvist og aðbúnað. Gerð er grein fyrir helstu fóðurtegundum sem henta í kanínurækt hérlendis. Fjallað um kynbætur og val lífdýra, frjósemi og helstu sjúkdóma.
JRT 412 Lífrænn landbúnaður
Kennari: Ásdís Helga Bjarnadóttir, M.Sc., asdish@lbhi.is
Markmið: Að nemandi kynnist vistvænum og lífrænum landbúnaði og geti yfirfært þekkingu sína á hérlendar aðstæður.
Lýsing: Nemandinn kynnist skilgreiningum innan vistvæns og lífræns landbúnaðar, kynnist hugmyndafræði, reglugerðum og aðferðum í lífrænum landbúnaði, kynnist þróun lífræns landbúnaðar í heiminum og möguleikum og þróun lífræns landbúnaðar á Íslandi.
LND 412 Vatnanýting Valáfangi
Kennari: NN
Markmið: Að nemandi þekki til helstu atriða er varðar nýtingu ferskvatnsfiska er lifa hérlendis, bæði eldisfiska og villtra fiska.
Lýsing: Kennd eru grundvallaratriði í líffræði og vistfræði straum- og stöðuvatna. Fjallað er um lífsferil og lífsmáta þeirra ferskvatnsfiska sem finnast hér á landi. Gerð er grein fyrir þeim aðferðum sem notaðar eru til að meta straum- og stöðuvötn fræðilega. Fjallað er um helstu þætti í eldi vatnafiska, svo sem fóður og fóðrun þeirra, sjúkdóma sem hrjá þá og varnir gegn þeim.
4. ÖNN (í skóla)
BST 213 Bústjórn 2 Skylduáfangi
Kennari: Stefanía Nindel B.S., stefania@lbhi.is
Markmið: Að nemandi geti tekið ákvarðanir um fjárfestingar út frá tiltækum upplýsingum, geti aflað sér upplýsinga sem þarf til slíkra ákvarðana og þekki til helstu fjáfestingaleiða. Að nemandi þekki til helstu kenninga markaðsfræðinnar og gæðastjórnunar.
Lýsing: Nemandinn kunni skil á stöðu bóndans sem framleiðanda og stjórnanda, samspili hans og ýmissa umhverfisþátta. Þá lærir nemandinn að reikna út ýmsa kostnaðarþætti og fjárfestingar af margvíslegum toga (s.s. hús, vélar, ræktun o.fl.), læri að meta arðsemi þeirra og geti aflað sér upplýsinga um hvernig fjárfestingar eru fjármagnaðar. Farið verður lítillega í markaðsfræði og gæðastjórnun.
BÚT 212 Búvélafræði 2 Skylduáfangi
Kennari: Grétar Einarsson, bútæknifræðingur, gretar@lbhi.is
Kennsluefni: Hvamm, S.A.2002. Markens maskiner. Greinar o.fl. sem bent er á.
Markmið: Að nemandi þekki til helstu véla sem notaðar eru í landbúnaði og sé fær um að beita þeim af þekkingu og öryggi.
Lýsing: Fjallað er um vélar til jarðvinnslu, áburðardreifingar, heyskapar og uppskerustarfa. Efnistök beinast einkum að því að fjalla um grunnuppbyggingu véla, vinnsluaðferðir og vinnugæði, stillingaratriði, og tengingar við aflvél. Þá er einnig fjallað um aflþörf, afköst og einstaka vélar sem hluta af í vélakosti búsins. Áhersla er einnig lögð á atriði sem varða áhrif vélanna á umhverfi sitt svo og öryggisatriði varðandi meðferð þeirra. Verklegar æfingar og sýnikennsla eru þáttur í náminu.
FEL 101 Félags- og stoðkerfi landbúnaðarins Skylduáfangi
Kennari: Magnús B. Jónsson, Dr. Scient, magnusb@lbhi.is
Kennsluefni: Löggjöf og samningar um félags og stoðkerfi landbúnaðarins.
Markmið: Að nemandi kunni skil á félagskerfi landbúnaðarins og þeirri stoðþjónustu sem íslenskum landbúnaði stendur til boða. Að námskeiðinu loknu geti nemandinn tekið virkan þátt í félagsstarfi og viti hvar leita skal aðstoðar og upplýsinga um málefni landbúnaðarins hverju sinni sem stjórnandi (bóndi).
Lýsing: Fjallað um opinbera stjórnsýslu landbúnaðrins, Fjallað um félagskerfi landbúnaðarins. Fjallað um starfsemi Bændasamtaka Íslands, búnaðarsambanda, hreppabúnaðarfélaga.,búgreinafélaga og annarra fagfélaga bænda. Helstu stofnair landbúnaðarins kynntar svo og starfsemi þeirra.
LND 202 Beitarfræði og landbætur Skylduáfangi
Kennari: Árni Brynjar Bragason B.S., arni@lbhi.is
Kennsluefni: Anna G. Þórhallsdóttir. 1992. Beitarfræði. Borgþór Magnússon o.fl. 1997. Hrossahagar. Ljósrit og greinar sem kennari bendir á.
Markmið: Að nemandi kunni skil á gróðurþróun á Íslandi og helstu orsökum gróðrufarsbreytinga. Þekki til beitaráhrifa á mismunandi gróður hérlendis og sé fær um að stjórna beit og meta áhrif hennar á mismunandi árstímum. Þekki helstu leiðir í landgræðslu- og landbótastarfi.
Lýsing: Fjallað um almenna gróðurþróun í heiminum og á Íslandi, orsakir gróður- og jarðvegshnignunar og afleiðingar með sérstakri áherslu á þátt beitar. Áhrif beitar á einstakar plöntur og viðbrögð mismunandi plantna við beit. Helstu gróðurlendi í íslenskum úthaga kynnt og fjallað um beitarþol þeirra. Næringargildi beitargróðurs, beitarnýting mismunandi búfjártegunda og þættir sem hafa áhrif á beitarnýtinguna. Fjallað um beitarálag, beitarþunga og mat á ástandi og þróun beitilands. Rætt um helstu beitarstjórnunaraðferðir. Leiðir til landbóta skoðaðar. Fjallað um helstu tegundir plantna sem notaðar eru til landgræðslu/bóta. Stofnanir, lög og reglugerðir sem varða nýtingu lands til beitar verða kynntar. Landnýtingarþáttur gæðastýringar í sauðfjár- og hrossarækt skoðaður sérstaklega. Nemendur vinna beitarskipulag fyrir eina bújörð.
LND 332 Nytjaskógrækt Skylduáfangi
Ábyrgðarmaður: Árni Brynjar Bragason, B.S., arni@lbhi.is
Kennsluefni: ATHUGA.
Markmið: Að nemendur verði færir um að taka þátt í verkefnum á borð við bændaskóga og kunni skil á helstu atriðum er varðar skógrækt á Íslandi.
Lýsing: Í áfanganum verður fjallað um skógrækt sem búgrein. Megináhersla verður lögð á ræktun skóga til viðarnytja en einnig minnst á önnur not af skógum og trjám, svo sem jólatré, eldivið, beit, ber og sveppi, skjól og yndi. Fjallað verður um helstu markmið skóg- og trjáræktar, áhrif skógræktarskilyrða á markmið með skógrækt á hverjum stað auk þess að helstu vinnubrögð, trjátegundir, vandamál og skaðvaldar í skógrækt á Íslandi verða kynnt. Notkun skógræktaráætlana verður kennd og fjallað um stofnanaumhverfi skógræktar auk þess sem styrkjakerfi skógræktar verður kynnt.
MÆT 402 Skólasókn Skylduáfangi
Umsjón: Kennslustjóri
Áfanginn er skólasókn á fyrstu, annari, þriðju og fjórðu önn búnaðarnámsins, að undanskilinni námsdvöl. Við einkunnarútreikning þessa áfanga er meðaltal reiknað af skólasóknareinkunnum fjögura tímabila í skólanum (1. og 4. önn, auk þess hluta 2. og 3. annar sem teknir eru í skóla). Nemendum ber að mæta tímianlega í allar kennslustundir. Fjarvistir nemenda eru skráðar af kennurum og á grundvelli þeirrar skráningar er fundin skólasóknareinkunn hvers nemanda samkvæmt framansögðu.. Lágmarkseinkunn til þess að fá einingar í skólasókn er 4,5. Þeir nemendur sem fá lægri einkunn fá einingarnar ekki viðurkenndar. Slæleg mæting í kennslustundir getur varðar brottvísun úr skóla.
BFR 513 Nautgriparækt 2 Bundið val
Kennari: Sverrir Heiðar, B.S., sverrir@lbhi.is
Kennsluefni: Sveinn Guðmundsson. 1996. Hraustar kýr
Alfnes, T. og Österås, O. 1997. Mjaltir og mjólkurgæði (BÍ).
Markmið: Að nemandi kunni skil á nautgripakynbótum, þekki til mjólkur- og nautakjötsframleiðslu og öðlist færni og þjálfun í meðferð og hirðingu nautgripa á öllum aldri og við mismunandi aðstæður. Að nemandinn þekki aðferðir til hagræðingar í rekstri kúabús.
Lýsing: Gerð er grein fyrir uppbyggingu og framkvæmd kynbótastarfs í nautgriparækt. Greint frá markaði með afurðir nautgripa hérlendis og í alþjóðlegu samhengi. Fjallað um kjötframleiðslu, kjötmat og kjötgæði. Áhrif mjalta og mjaltatækja á heilbrigði gripa og gæði mjólkur með tilliti til mjólkurvinnslu eru sérstaklega tekin fyrir m.a. með áherslu á frumutölu.
Ræddir möguleikar kúabænda til að auka hagkvæmni í búskap sínum við ríkjandi aðstæður. Lífræn og vistvæn mjólkurframleiðsla. Siðfræði mjólkurframleiðslu. Nemendur fá þjálfun í viðhaldi mjaltabúnaðar, kúadómum og klaufsnyrtingu. Námsferð í mjólkursamlag og fjósskoðun.
BFR 523 Sauðfjárrækt 2 Bundið val
Kennari: Árni Brynjar Bragason, B.S., arni@lbhi.is
Kennsluefni: Ljósrit og ýmis gögn sem kennari vísar á eða afhendir
Markmið: Að nemandi þekki til sauðfjárræktar í heiminum og kunni skil á atriðum er varða kynbætur sauðfjár. Að nemandi geti aukið hagræðingu sauðfjárbús með viðurkenndum aðferðum bæði vinnulega og afkomulega séð.
Lýsing: Staða sauðfjárræktar í heiminum. Flokkun fjárkynja. Erfðir séðra og mældra eiginleika og erfðatengsl milli eiginleika skýrð. Starfsemi fjárræktarfélaga gerð ítarleg skil s.s. skýrsluhaldi, einkunnum fyrir ýmsa eiginleika, notkun Blups hjá sauðfé, afkvæmarannsóknum og fleiru. Notkun á skýrsluhaldsforritinu Fjárvís kynnt. Rætt um áhrif frjósemi, fallþunga og flokkunar kjöts á afkomu búsins. Skoðaðir möguleikar sauðfjárbænda til að auka hagkvæmni í búskap sínum við ríkjandi aðstæður. Fjallað um sauðfjársamninginn og gæðastýringuna sem honum tengist. Rætt um fjárhúsbyggingar og vinnuhagræðingu. Möguleikar á framleiðslu afurða úr sauðamjólk kynntir. Notkun fjárhunda kynnt. Verkleg þjálfun í vélrúningi. Farið í heimsóknir á sauðfjárbú.
BFR 532 Hrossarækt 3 Valáfangi
Kennari: Magnús Lárusson, M. Ag. maggilar@lbhi.is
Markmið: Að gera nemanda hæfan til að ná 4. stigi í knapamerkjakerfi “Átaksverkefnis í hrossarækt”.
Lýsing: Nemendum er kennt 4. stig knapamerkjakerfisins, að frumtemja, um æxlunarfræði og byggingadóma hrossa. Hver nemandi þarf að koma með tvo hesta. Annan sem hentar til náms í knapamerkjakerfinu, og hinn ótaminn sem hentar í frumtamningakennslu. Hesturinn í reiðkennsluna þarf að vera taminn og þjáll á feti, brokki, stökki og tölti. Nemendur fylgjast í æxlunarfræðinni m.a. með fylfullri hryssu tvær síðustu vikur meðgöngunnar og þar til hún fer í fyrstu læti og fær við stóðhesti. Nemendur kynnast byggingadómum hrossa.
BST 522 Búrekstraráætlanir Valáfangi
Kennari: Stefanía Nindel B.S., stefania@lbhi.is
Markmið: Að nemandi geti gert búrekstraráætlanir út frá réttum forsendum og aflað sér þeirra gagna sem til þess þarf.
Lýsing: Nemandinn kunni skil á hagstjórn, hámörkun ágóða og geti lagt mat á arðsemi fyrirtækis. Rætt er um markmiðssetningu, ákvarðanatöku og áætlanagerð. Farið er í fjárhagsáætlanir fyrir fyrirtæki, umhverfi fyrirtækjareksturs og stjórnferli fyrirtækja. Fjallað um hvernig bóndinn geti lesið upplýsingar úr umhverfi sínu til að nýta við búreksturinn.
BÚT 512 Búsmíði Valáfangi
Kennari: Jóhannes Ellertsson, vélvirki, joi@lbhi.is.
Markmið: Að nemandi öðlist færni í nýsmíði og viðgerðum sem að gagni geta komið í almennum búrekstri.
Lýsing: Kennslan fer nær eingöngu fram sem verklegar æfingar í málmsuðu, málmsmíðum og meðferð ýmissa tækja. Nemendur smíða einhverja nytsama hluti í áfanganum s.s. heyskera, hliðgrindur, staurasleggju, kerrur eða vélaundirstöður.
JRT 522 Rótarávextir og nýjar fóðurjurtir Valáfangi
Kennari: Edda Þorvaldsdóttir, B.S., edda@lbhi.is
Kennsluefni: Ýmis rit og greinar tengdar efninu
Markmið: Að nemandi kynnist ræktun rótarávaxta og verði fær um að stunda slíka ræktun sér til gagns og ánægju. Einnig að kynna nemendum nýjar fóðurjurtir sem til greina kemur að nýta hérlendis.
Lýsing: Gerð grein fyrir ræktun kartaflna, gulrófna, gulróta og fleiri rótarávaxta og helstu einkennum og nytjum hverrar tegundar. Fjallað er um illgresiseyðingu, sumarhirðingu, upptöku, geymslu og sjúkdóma er snerta fyrrgreindar tegundir. Markaðsaðstæðum og markaðsöflun jarðávaxta gerð skil.
Leitast er við að kynna fóðurjurtir sem til greina gætu komið í ræktun hérlendis.
JRT 532 Grænmeti og ber Valáfangi
Kennari: Árni Brynjar Bragason, B.S., arni@lbhi.is
Kennsluefni: Magnús Óskarsson og Óli V. Hansson. 1983. Grænmeti úr eigin garði. Óli V. Hansson (ritstj.). 1978. Matjurtabókin.
Markmið: Að nemandi geti komið af stað eigin heimilisgarðrækt, geti þróað eigin ræktunaraðferðir við mismunandi skilyrði og veitt almenn ráð um heimilisgarðrækt og nýtingu íslenskra plantna til matar.
Lýsing: Fjallað um sögu heimilisgarðræktar á Íslandi. Farið ítarlega í aðferðir við val á garðlandi og veðurfarsbætandi aðgerðir, sáningu, uppeldi, útplöntun, sumarhirðingu og uppskeru. Illgresiseyðingu og vörnum gegn plöntusjúkdómum gerð skil. Kynntar eru helstu tegundir matjurta og berja sem reynast vel í útiræktun á Íslandi. Einnig sagt frá tegundum í íslensku flórunni sem nýttar eru til matar og nýtingarmöguleikum þeirra.
JRT 542 Endurræktun túna og einærar fóðurjurtir Valáfangi
Kennari: Edda Þorvaldsdóttir, B.S., edda@lbhi.is
Kennsluefni: Ýmis rit og greinar sem tengjast efninu. Námsefni jarðvegs og áburðarfræði.
Markmið: Að nemandi hafi þekkingu til að meta endurræktunarþörf og taka ákvörðun um með hvaða hætti endurræktun fari fram. Samfara því þekki hann helstu einærar fóðurjurtir sem nýtanlegar eru hérlendis og kunni skil á notkun og ræktun þeirra.
Lýsing: Mat á endurræktunarþörf, gróðurfar túna og þættir sem hafa áhrif á hvernig það breytist. Mat á stöðu gróðurfars og framræslu. Hagkvæmni endurræktunar. Endurnýjun gróðurfars án jarðvinnslu. Viðhald og endurnýjun framræslukerfa. Jarðvinnslutækni við endurvinnslu, plöntuval, sáning og frágangur flags. Áburðarnotkun og varnir gegn illgresi. Rekstraráætlun.
Fjallað er um ræktun einærra fóðurjurta sem rækta má hérlendis sem grænfóður og til þroska. Farið í kröfur tegundanna til jarðvegs og veðurfars, vaxtarferla, uppskeru og efnainnihald þeirra ásamt nýtingarmöguleikum. Sérstök áhersla er lögð á ræktun byggs til þroska.
LND 512 Landnýting og náttúruvernd Valáfangi
Kennari: Ragnhildur Sigurðardóttir, M.Sc., ragnhildurs@lbhi.is
Markmið: Að nemandi kynnist landnýtingu og náttúruvernd hérlendis á sem víðustum grunni og samspili þessara þátta við landbúnaðinn.
Lýsing: Í áfanganum er gefið yfirlit yfir landnýtingu á Íslandi. Fjallað um loftmyndir og notkun þeirra. Nemendur læra kortagerð og vinnu með kort t.d. gróður- og jarðvegskort. Helstu lög og reglugerðir sem varða umhverfis- og skipulagsmál eru kynnt. Nemendur vinna landnýtingaráætlun. Siðfræði og saga náttúruverndar. Líffræðilegur fjölbreytileiki og ógnun við lífverur. Búsvæði, innflutningur og nýting tegunda. Áhrif mengunar. Saga og skipulag náttúruverndar á Íslandi. Lög sem varða náttúruvernd. Náttúruvernd og landbúnaður, friðun og nýting.
Til baka - efst á síðu